ஆவி's கிச்சன் - சிக்கன் குலோப் ஜாமூன் (அசைவம்)

                   
                                ஆவி's  கிச்சனுக்கு ஒரு நல்ல படம் தயார் செய்து தரச் சொல்லி கேட்க நம்ம வாத்தியார் கிச்சனை விட்டு நகர முடியாதபடி திகட்ட திகட்ட ஒரு படத்தை தயார் செய்து கொடுத்து திக்கு முக்காட செய்துவிட்டார். டேங்க்ஸ் வாத்தியாரே!!
                                   

 சிக்கன் குலோப் ஜாமூன் 

தேவையான பொருட்கள்:

                              

குலோப் ஜாமூன் மிக்ஸ் -  1 பாக்கெட் ( MTR சிறப்பாக இருக்கும், ஆனால் அது உங்கள் விருப்பத்தை பொறுத்தது.)

பாத்திரங்கள்  - 2 ( மாவு பிசைவதற்கும், ஜீரா தயாரிப்பதற்கும்)

வாணலி  - 1

பால்                 - அரை கப்  (காய்ச்ச வேண்டாம்)

வெண்ணை  - 1/4  டீ-ஸ்பூன் மட்டும் 

சிக்கன்            - 100 கிராம்  ( பொடிப் பொடி துண்டுகளாய் வெட்டி வைத்துக் கொள்ளவும்.)

சர்க்கரை - 2 கப்

எண்ணெய் - தேவைக்கேற்ப

பட்டர் ஷீட் - 1

எலுமிச்சை - 1

ஏலக்காய் - 2

செய்முறை விளக்கம்: 

1. குலோப் ஜாமூன் மிக்ஸ் பாக்கெட்டை பிரித்து பாத்திரத்தில் கொட்டி அரை கப் பாலை ஊற்றி பத்து நிமிடம் ஊற வைக்கவும். 
2. சிக்கன் துண்டுகளை குக்கரில் போட்டு ஒரு ஐந்து நிமிடம் வேக விடவும் (விசில் வேண்டாம் )
3. அதற்குள் சர்க்கரைப் பாகு தயாரித்து விட்டு வந்தால் நேரம் சரியாக இருக்கும். (கீழே பார்க்கவும் )
4.  ஊற வைத்த மாவை பந்து போல் (பட்டர் ஷீட் மேல் ) உருட்டவும். பட்டர் ஷீட் தேவைக்கு அதிகமான ஈரப்பதத்தை உறிஞ்சி விடும்.
5. பின்பு சிறு சிறு உருண்டைகளாக பிடிக்கவும். ( ரொம்பவும் சிறியதாக இருந்தால் இனிப்பு அதிகம் உறிஞ்சி விடும், ரொம்பவும் பெரியதாக செய்தால் உள்ளே வேகாமலும் வெளியே கருகிவிடும் அபாயமும் உள்ளதால் மீடியம் சைசில் பிடிக்கவும்)
6. வேக வைத்த சிக்கன் துண்டுகளை உள்ளே வைத்து மீண்டும் உருண்டை பிடிக்கவும்.
7. வாணலி (அ ) வடசட்டியில் எண்ணெய் ஊற்றவும். சற்று சூடான பின் ஒரு துளி மாவைக் கிள்ளிப் போட்டுப் பார்த்து சூட்டைக் கணிக்கவும்.
8. சூடானதை உறுதி செய்த பின் உருண்டைகளை நான்கு அல்லது ஐந்து செட்களாக போடலாம். 
9. உருண்டைகள் பொன்னிறமாக மாறும் போது எடுத்து எண்ணையை வடிகட்டி பின் மிதமான சூட்டில் கொதிக்கும் ஜீராவில் போடவும்.
10. எல்லா உருண்டைகளும் தயாரான பின் அடுப்பை அணைத்து உருண்டைகளை சிறிது சூடு ஆற விடவும். 
11. ஒரு மணி நேரம் சர்க்கரைப் பாகில் ஊறிய பின் வேறொரு கண்ணாடி பாத்திரத்தில் மாற்றி வைக்கவும்..
12. சுவையான சிக்கன் குலாப் ஜாமூனை பரிமாறவும்..

சர்க்கரை பாகு (ஜீரா) தயாரிக்க:

1. ஒரு அகண்ட பாத்திரத்தில் 2 கப் நீருக்கு  2 கப் சர்க்கரை சேர்த்து கொதிக்க விடவும். 
2. மணம் சேர்க்க பொடி செய்யப்பட்ட ஏலக்காய் சேர்த்துக் கொள்ளலாம்.
3. சிறிது எலுமிச்சை சாறு சேர்த்துக் கொள்ள பாகு கெட்டியாகாமல் இருக்கும்.
4. மிதமான சூட்டில் இதை கொதிக்க வைத்தபடியே குலாப் ஜாமூன் ரெடி பண்ணப் போகலாம். (கம்பி பதம் தேவையில்லை )

( பி.கு) : சிக்கன் சேர்த்திருப்பதால் காலையில் செய்த பதார்த்தத்தை மாலைக்குள் முடித்து விடுவது நல்லது.

                                                   **************