முன்குறிப்பு: நண்பர்களே, நான் ஒரு பதினைந்து வருடங்களுக்கு முன் எழுதிய (என் கன்னி முயற்சி) ஒரு க்க்க்க்க்ரைம் தொடர். இப்போது படிக்கையில் பல அபத்தங்கள் என் கண்ணுக்கே புலப்படுகிறது. ஆயினும் அதை ஒரு பொருட்டாக்காமல் இந்த கதையை படித்து உங்கள் மேலான விமர்சனங்களால் என்னை ஒரு நல்ல எழுத்தாளனாக்கும் சீரிய பணியில் நீங்களும் ஈடுபடுவீர்களாக!!
அவர் சற்று பதட்டத்துடன் காணப்பட்டார். அவருக்குச் சுமார் நாற்பது, நாற்பத்தியிரண்டு வயதிருக்கலாம். "தேவர் மகன்' ஸ்டைலில் மீசை. "குருதிப் புனல்" ஸ்டைலில் கட்டிங். கண்களில் கம்பீரம் அவரது காக்கி உடுப்பு அவரது போலிஸ் உத்தியோகத்தை சுட்டிக் காட்டியது. அவர் பேட்ச் சிவஞானம் IPS என்று பறை சாற்றியது. அவருக்கு எதிரில் இந்தி நடிகர் அமீர்கானை நினைவு படுத்தும் முகத்துடன் டிடக்டிவ் ஏஜென்ட் சுந்தர் அமர்ந்திருந்தான். அவனுக்கு சற்று தள்ளி அவனது அசிஸ்டன்ட் ஆனந்த் அமர்ந்திருந்தான்.
சிவஞானம் பேச ஆரம்பித்தார் "மிஸ்டர் சுந்தர், இப்ப நான் சொல்லப் போற விஷயம் ரொம்ப சீக்ரெட்டா இருக்கணும். கடந்த ஒரு மாசத்துல நடந்த இரண்டு கொலைகளைப் பத்தி பேப்பர்ல படிச்சிருப்பீங்களே? " "ம்ம்.. சொல்லுங்க.." "நான் ஸ்ட்ரேயிட்டா விஷயத்துக்கு வர்றேன். " என்றபோது ஆனந்த் " அப்ப இவ்வளவு நேரம் க்ராஸா கிராஸா வந்துட்டு இருந்தீங்களா?" என்ற ஆனந்தைப் பார்த்து " ஆனந்த், பீ சீரியஸ்" என்று கூறிவிட்டு சுந்தர் சிவஞானத்திடம் " ப்ளீஸ் கண்டின்யு ஸார் " ஆனந்தை முறைத்தவாறே "அந்த ரெண்டு கொலைகளும் திட்டமிட்டு செய்யப்பட்ட கோல்ட் ப்ளட்டட் மர்டர்ஸ்." "ப்ளான் பண்ணி பண்ணியிருக்காங்களா" என்று வடிவேலு தொனியில் கேட்ட ஆனந்தை இருவரும் முறைத்துவிட்டு "ரெண்டு பேருமே பெரிய பிஸினஸ் மேக்னட்ஸ். இந்த ரெண்டு கொலைகளையும் கொலைகாரர்கள் அல்லது கொலைகாரன் சர்வ ஜாக்கிரதையா ஒரு சின்ன தடயத்தைக் கூட மிஸ் பண்ணாம சாமர்த்தியமா பண்ணியிருக்கான். எங்க டிபார்ட்மெண்ட் எவ்வளவோ முயன்றும் அவனைப் பிடிக்க முடியல. சோ வீ நீட் யுவர் ஹெல்ப் டு பைண்ட் ஹிம்.." என்றார்.
" ஹிம் முன்னு நீங்களே முடிவு பண்ணிட்டா எப்படி?" என்று குறுக்கிட்ட ஆனந்த்தை சுட்டெரிக்கும் பார்வையால் அமர்த்திவிட்டு சுந்தர் அவரிடம் "கொலை செய்யப்பட்ட அழகேந்திரன், பத்ரிநாத் ரெண்டு பேரோட வீட்டையும் நான் சேர்ச் பண்ணனும். பர்மிஷன் வாங்கித் தாங்க. எங்க வேலையில எங்களுக்கு பூரண சுதந்திரம் இருக்கணும். எக்காரணம் கொண்டும் இந்த விசாரணையை பாதியில நிறுத்த சொல்லக் கூடாது. மற்றபடி வீ வில் ட்ரை அவர் பெஸ்ட். நீங்க போயிட்டு வாங்க." என்று கூறினான்.
அவர் சென்றபின் ஆனந்திடம் "அவர் சொன்னதிலிருந்து உனக்கு என்ன தோணுது.?" "சூடா ஒரு கப் காபி சாப்பிடனும்னு தோணுது" என்றான். "ஆனந்த் கமான், யுவர் ஹ்யூமர் இர்ரிடேட்ஸ் சம் டைம்ஸ்" " என்ன தோணுது.. அவர் என்னமோ வந்தாரு, எதோ மொட்டைத்தலையன் குட்டையில விழுந்த மாதிரி ஒரு கதைய சொன்னாரு. இத பாரு சுந்தர், அந்த ரெண்டு கேஸும் தமிழ்நாடு போலீஸால அக்கு வேறா ஆணி வேறா ஆராயப்பட்டு தோல்வி கண்ட கேஸ். நாம என்ன செய்ய முடியும்?" "ஏதாவது செய்யணும் ஆனந்த். அப்பத்தான் நம்ம கோல்டன் ஈகிள் டிடெக்டிவ் ஏஜென்சிக்கு மக்கள் மத்தியில ஒரு நல்ல பேர் கிடைக்கும்." "ஆனந்த் இட்ஸ் எ சேலஞ்ச் பார் மீ" "பார் அஸ் ஸுன்னு சொல்லு" என்றவாறு இருவரும் சிரித்தனர். பின் ஆனந்த் சுந்தரிடம் "ஒக்கே சுந்தர். லெட் அஸ் ஸீ டுமார்ரோ, மை வுட் பீ வில் பீ வெயிட்டிங் பார் மீ" என்று கூறிவிட்டு தன் யமஹாவில் கிளம்பினான். சுந்தர் அவனை அனுப்பிவிட்டு உள்ளே சென்றான்.
