ஒளி காட்டும் வழி!

தீப ஒளியாம் தீபாவளி

தீபாவுக்கு மட்டும் ஏன் இல்லை முகத்தில் ஒளி?

கட்டம் போட்ட சட்டையும், நீல நிற ஜீன்ஸுமே,

வட்ட வட்ட பொட்டுடன் வண்ண சுடிதாருமே,

காரின் மீது ஏறியே கடைக்கு சென்று வாங்குவோம்.

கழுத்தாரம், கடியாரம் ஒரு வாரம்,

லோலாக்கும், மிதியடியும் மறு வாரம்,

செல்வத்தின் மிகுதியினை உலகிற்கு காட்டுவோம்.

திரைப்படத்தை கண்டிடவே சில ஆயிரம்,

ஒரு நேரம் உண்டு மகிழ சில ஆயிரம்,

ஆடம்பர வாழ்க்கைமுறை இதை பறைசாற்றுவோம்.

இருப்பதற்கு மாளிகை போல் ஒரு வீடு,

அடிக்கடிதான் மாற்றிக்கொள்ளும் செல்பேசியோடு,

மேல்தட்டின் மேன்மையை நாம் உணர்த்திடுவோம்.

சிகையதனை திருத்திடுவோம் சீரோடு,

வகைதொகையாய் சுற்றிடுவோம் ஊரோடு,

வருமானப் பெருக்கத்தின் வளர்ச்சியையும் காட்டிடுவோம்.

சாலையிலே, சந்தினிலே, மூலையிலே,

பசியோடும், ஏக்கத்தோடும், வருத்ததோடும் 

ஆங்காங்கே சந்திக்கும் ஒரு பெண் தான் நம் தீபா.

மண்ணில் பிறந்ததிவள் குற்றமில்லை,

மன்றாடி பெற்றுக்கொள்ள யாருமில்லை,

வறுமைக்கோடெனும் வெம்மையான கூரையின் கீழ் வாழும் இவளுக்கு,

பலகாரம், பட்டாசு, பட்டாடை தேவையில்லை,

வேண்டுவது மூன்று வேளை உணவேயன்றி வேறு இல்லை,

பகட்டான வாழ்க்கைக்கு மத்தியில் நாம்,

இயன்றதையே மனமுவந்து கொடுத்திடலாம்.

ஊரெங்கும் கொண்டாடும் தீபாவளி! 

தீபாவின் முகத்தினிலே ஏற்றிடலாம் நீங்களும் ஒளி!!

                                        *******************

ரூபன் அவர்களின் தீபாவளிச் சிறப்பு கவிதைப் போட்டிக்கு அனுப்பும் கவிதை இது.. எப்படியிருக்குன்னு உங்க கருத்துகளை சொல்லுங்க..