ஆவி டாக்கீஸ் - மான் கராத்தே

இன்ட்ரோ  

                பாக்ஸிங் என்றால் என்னவென்றே தெரியாத ஒருவன் பைனல்ஸ் வரை வர முடியுமா? அப்படியே வந்தாலும் பல வருடங்களாக சாம்பியனாக இருக்கும் ஒருவனை வீழ்த்த முடியுமா போன்ற லாஜிக்கெல்லாம் பார்க்காமல் (கூட சித்தர் சித்து விளையாட்டுகளையும் சேர்த்துக்கோங்க) படம் பார்த்தால் இந்த சம்மருக்கு நல்ல ஜில்-மோர் இந்த மான் கராத்தே.

கதை         

                  சத்வம் கம்ப்யுட்டர்ஸ் பணியாளர்கள் ஐந்து பேர் உல்லாசப் பயணமாக "சந்திரகிரி" பாரஸ்ட்டுக்கு செல்கின்றனர். அங்கே ஒரு சித்தரை சந்திக்கும் இவர்கள் அவரை சோதிக்க விரும்பி ஒரு விஷயம் கேட்க, அதை அவரும் கொடுக்க முதலில் நம்ப மறுக்கும் அவர்கள் வாழ்வில் சில விஷயங்கள் சித்தர் வாக்கின்படி நடக்க பின் நம்பிக்கை வந்து ஒரு சாமானியனை பாக்ஸர் ஆக்குவது தான் கதை. இடையில் அந்த சாதாரண பீட்டருக்கும் ஒரு பட்டுக் குட்டிக்கும் ஏற்படும் லவ், மற்றும் அவர் இந்த பாக்ஸிங்கிற்கு தயாராவதை காமெடியாக சொல்லியிருக்கிறார்கள்.

                   காதல் வருவதை இயல்பாக காட்டுவதாய் சொல்லி இவர்கள் காட்டுவது எல்லாமே நிஜ காமெடி. சாதாரண தமிழ் வாத்தியார் பெண் ஐ-போன், ஆப்பிள் லேப்டாப் வைத்திருப்பதில் துவங்கி சூரி வரும் காட்சிகள், இறுதிக் காட்சி என ஏகப்பட்ட அபத்தங்கள்/ லாஜிக் மீறல்கள்.. ஆனாலும் அவற்றை எல்லாம் யோசிக்க விடாதபடி வேகமாக நகரும் திரைக்கதை, சதீஷின் ஒன்-லைனர்கள், சிவாவின் டூமாங்கோலி இங்க்லீஷ், ஹன்சிகாவின் கவிதை பேசும் கண்கள்  என நம்மை இழுத்துச் செல்கிறது. காதலனுக்கு "கிட்னி பேட்" வாங்கிக் கொடுப்பதெல்லாம் டூ மச்.

ஆக்க்ஷன் 

                                 "வருங்கால சூப்பர்ஸ்டார்" பட்டத்தை போட்டுக்கொள்ளாமல் சர்ச்சையிலும் சிக்காமல் நெக்ஸ்ட் டோர் பாய் கதைகளையே கேட்டு நடிப்பதால் விராட் கோஹ்லி போல் ஒவ்வொரு படத்திலும் ஸ்கோர் செய்கிறார். கீப் இட் அப் சிவா..! ஹன்சிகா- "வாட் எ வெள்ளை" என்ற அறிமுகத்துடன் வரும் இவர் ஆங்காங்கே வந்து போகாமல் கொஞ்சம் நடிக்கவும் செய்திருக்கிறார். சதீஷ் இன்னும் கொஞ்சம் கேரக்டர் உள்ள படங்களை தேர்வு செய்தால் முழுநீள காமெடியன் (?) ஆகலாம்!

                                     தோழியாக வரும் அந்த "மெத்தை" இனி அடிக்கடி தலை காட்டும் வாய்ப்புகள் பிரகாசமாக இருக்கிறது. சூரி கடுப்பேத்தும் காமெடி என்றாலும் கிச்சுகிச்சு மூட்டுகிறது. வில்லர் பாவம் சிவா ஜெயிக்க வேண்டும் என்பதற்காக அப்படியெல்லாம் சொல்ல வேண்டுமா என்ன? போட்டியில் விட்டுக் கொடுக்க முடியாது என்பதற்கு அவர் மனைவியிடம் சொல்லும் இடத்தில் நல்லவராகவும், வெளியில் வந்தபின் "அக்மார்க்" வில்லனாகவும் காட்டியிருக்கிறார்கள். தமிழ் சினிமா திருந்தவே திருந்தாதா?                      

                                                                                             

இசை-இயக்கம்-தயாரிப்பு

                                 அனிருத்- பாடல்களில் படத்தை நகர்த்தாமல் பின்னணி இசையிலும் மெனக்கெட்டிருக்கிறார். ஒரு பாடலுக்கு நடனம் வேறு. ஐந்து படங்களில் அசுர வளர்ச்சி என்றே சொல்ல வேண்டும். ஏ. ஆர் முருகதாஸ் கதை மற்றும் தயாரிப்பு.. சித்தர் சரக்கு இல்லாமல் இது ஒரு வழக்கமான மசாலாவே..! இயக்குனர் அடுத்த படத்திலாவது கொஞ்சம் சீரியஸாக யோசிக்கலாம்.

                                      ஆவியை டச் செய்த காட்சி/பாடல்

                                 பாக்ஸிங் போட்டிக்கு சென்றால் தன் உயிரையே இழக்க நேரிடும் என்பதால் காதலியிடம் உண்மையை சொல்ல முயலும் இடத்தில் சென்டிமென்ட் நன்றாக ஒர்க் அவுட் ஆகியிருக்கிறது. "டார்லிங் டம்பக்கு" "ராயபுரம் பீட்டரு"  மற்றும் "உன் விழிகளில்" பாடல்கள் அருமை.

                  Aavee's Comments - Comedy Karate !