பயணிகள்-நிழற்குடை - 2014APR08

                  இந்த வார சிறப்பு விருந்தினர் நம்ம யுவராஜ் சிங். சமீபத்தில் நடந்து முடிந்த ஐ.சி.சி இருபது ஓவர் உலகக் கோப்பை பைனலில் முதலில் ஆடிய இந்திய அணிக்கு  விராட் கோஹ்லி தேவையில்லாமல் சிக்ஸர்களும் போர்களுமாய் அடித்து பதினைந்து ஓவர்களில் நூறைத் தாண்டிய போது உள்ளே நுழைந்த நீ-நாம் (You-We) பொறுப்பாக ஆடி "மெல்லத் திறந்தது கதவு" படத்தில் செந்தில் சொல்வாரே "எனக்கு தெரிந்ததெல்லாம் எருமை, கருமை, பொறுமை" என்று அதற்கு உதாரணமாய் நிலைத்து நின்று ஆடி வேகமாக சென்று கொண்டிருந்த இந்தியாவின் ஸ்கோரை கஷ்டப்பட்டு மட்டுப்படுத்தினார். இருந்தும் போட்டி முடிந்த பிறகு அவர் உழைப்புக்கு தகுந்த அங்கீகாரம் கிடைக்காதது வருத்தமே.  ( போட்டியின் முடிவில் விராட் ஸ்டம்ப்பை பிடுங்கி யுவியை தாக்கியதாக கேள்வி. இதை மீடியா உள்பட எல்லோருமே ரசித்ததால் இச்செய்தி வெளிவரவில்லை.. ஆவி ரசிகர்களுக்காக அந்த எக்ஸ்க்ளுசிவ் படம் இங்கே.. (என்ஜாய் மாடி!!)

                       யுவராஜ் தன் நிதானமான டெஸ்ட் பாணியிலான ஆட்டத்தை வெளிப்படுத்தியது தவறா? இல்லை செமி பைனலுக்கு முந்தைய ஆட்டத்திலேயே சொதப்பிய யுவராஜை பைனலுக்கு தேர்வு செய்தது கேப்டன் தோனி மற்றும் கிரிக்கட் போர்டின் தவறா? சொல்லுங்க மக்களே..

                                  ***************** X *******************

                        இனம் - படத்தை திரையரங்கிலிருந்து திரும்ப பெற்றுக் கொண்டார்களாம்.. ஜனநாயக நாட்டில் இப்படி ஒரு படம் எடுக்க உரிமை இல்லையா என ஒரு நட்பு வட்டம் கேட்டிருந்தது.. இந்தப் படம் பார்த்தவுடன் விமர்சனம் எழுத ஆரம்பித்து இரண்டு பத்திகள் எழுதியவுடன் நிறுத்திவிட்டேன்.. இதற்கெல்லாம் விமர்சனம் எழுதி ஆவி டாக்கீஸை களங்கப் படுத்திக் கொள்ள வேண்டாம் என முடிவெடுத்துவிட்டேன்.. (இதற்கு முன் இப்படி முடிவெடுத்தது நய்யாண்டி படத்திற்கு தான்)

தமிழர்களின் வேதனைகளையும், அவலங்களையும் பதிவு செய்ய வேண்டிய இடத்தில் விபத்தில் முடங்கிக் கிடக்கும் ஒரு பெரியவர் பிகினி உடை வெள்ளைக்காரிகளை பார்த்து ரசிப்பதாய் ஒரு காட்சி வைத்தது, படத்தின் மீதும் இயக்குனரின் மீதுமிருந்த மொத்த மதிப்புமே தகர்ந்து விட்டது... காசு பண்ண எப்படி வேணும்னா படம் எடுக்கலாம்.. காயப் படுத்த மட்டும் தான் இப்படி படம் எடுக்க முடியும்..!

                                  ***************** X *******************

                   உறவினர் ஒருவர் வாங்கி வந்த ஒரு ஆரஞ்சால் வீட்டில் ஒரு பஞ்சாயத்து. நிறம் ஆரஞ்சாக இருந்த காரணத்தால் என் தங்கையும், அம்மாவும் அதை ஆரஞ்சு என்றார்கள்.. உரித்து சாப்பிட்ட எனக்கு அது சாத்துக்குடி என தோன்றியது. இருவரும் விடாமல் அது "கமலா ஆரஞ்சு" அப்படித்தான் இருக்கும் என்றார்கள். நானோ அது கமலாவும் இல்ல சிவாஜியும் இல்ல.. சாத்துக்குடி தான் என்றேன்.. அத்தோடு நில்லாமல் அதை உரித்து அவர்களுக்கும் கொடுத்தேன். ஆரஞ்சு போல் அல்லாமல் கடினத் தோல், ஒவ்வொரு சுளையும் தனித்தனியாக அல்லாமல் கூட்டுக் குடும்பமாக இருந்தது இதெல்லாம் பார்த்த பின்னும் அவர்கள் இது கமலா ஆரஞ்சு தான் என்றார்கள். போராட்டத்தின் உச்சகட்டத்திற்கு வந்துவிட்ட நான் "சரி உங்களுக்கும் வேணாம், எனக்கும் வேணாம். கமலா சாத்துக்குடி ன்னு வச்சுக்கலாம்" என்றேன்.. சரிதானே!

                                  ***************** X *******************

                    நீண்ட நாட்களாய் பார்க்க நினைத்து கொஞ்ஜம் லேட்டாக நேற்று தான் பார்க்கக் கிடைத்தது "பண்ணையாரும் பத்மினியும்" . நல்ல படம் இடைவேளை வரை. அதற்கு மேல் படத்தை கொஞ்சம் இழுவையாய் கொண்டு சென்றது போல் இருந்தது. வழக்கம் போல் தமிழ் சினிமாவின் ஏகப்பட்ட லாஜிக் மீறல்கள் இதிலும்..  பண்ணையார் ஜெயப்பிரகாஷின் நடிப்பு ஆறுதல். விஜய் சேதுபதி நிறைவான நடிப்பு. "உனக்காக பொறந்தேனே" பாடல் தேன் மதுரம். இந்த பத்மினியை ஒரு முறை ரசிக்கலாம். 

                                  ***************** X *******************

                    எழுத்து சம்பந்தப்பட்ட ஒரு முயற்சிய தொடங்கலாம்னு இருக்கேன்.. வாத்தியாரும் பச்சைக்கொடி காட்டிட்டார்.. எனக்கு பிடிச்ச ஒரு விஷயத்த எல்லாருக்கும் பகிர ஒரு வாய்ப்பா அத நான் பாக்குறேன்.. அது என்னன்னு தெரிஞ்சா சொல்லுங்க பார்ப்போம்.. நான் பதிலை அடுத்த நிழற்குடை ல சொல்றேன்.

வர்ட்டா...!