ஆவி டாக்கீஸ் - பூவரசம் பீப்பீ

இன்ட்ரோ  

                சிறுவர்களுக்காக பெரியவர்கள் நடித்து வந்த மாயாஜாலப் படங்கள் ஒரு காலம். சிறுவர்களுக்காக சிறுவர்கள் நடித்து வந்த சிறுவர் படங்கள் ஒரு காலம். பெரியவர்களுக்காக சிறுவர்கள் நடித்து வெளிவரும் கோலி சோடா போன்ற படங்களின் வரிசையில், கோலி சோடாவில் தூக்கலாக தெரிந்த சிறுவர் ஹீரோயிசத்தை எதார்த்தமாக காட்டி நம் மனதில் நச்சென இடம் பிடிக்கிறது இந்த பூவரசம் பீப்பீ..

கதை         

                     ஆறாம் வகுப்பு முடிந்து விடுமுறை தொடங்கியவுடன் அதை ஜாலியாக கழிக்கும் சிறுவர்கள் மத்தியில் மூன்று பேர் மட்டும் தாம் இனிமேலும் சிறுவர்கள் அல்ல என உணர்ந்து (?!!) பொன்வண்டு பிடித்து விற்பனை செய்து தமக்கு தேவையான தின்பண்டங்கள் வாங்கிக் கொள்வதில் ஆரம்பித்து, மழைநாள் ஒன்றில் கண்மாயில் நீச்சல் அடிக்கச் செல்ல அங்கே யாரோ சிலர் ஒரு பெண்ணை கற்பழிப்பதை பார்த்துவிட பின்னர் அவர்கள் யார், என்ன என்பதை துப்பறிந்து கண்டுபிடித்து பின் காவல் துறையில் தக்க ஆதாரங்களுடன் மாட்டி விடுவதே கதை.

                     இந்தக் கதையை இன்னமும் சுவாரஸ்யமாக்க வரம்பு மீறாத ஒரு அரும்பு காதலும், காதலுக்காய் சிறுவர்கள் அடித்துக் கொள்ளும் காட்சிகளும் உண்டு. துளி பிசகினாலும் ஆபாசமாக தெரியக் கூடிய பல விஷயங்களை பக்குவமாக சொன்னதற்காகவே அந்த அறிமுக பெண் இயக்குனர் ஹலிதா ஷமீமுக்கு பாராட்டுகள். ஆண் பருவமடையும் காட்சியை அழகாய் படமாக்கிய இயக்குனர் கற்பழிப்பை பற்றிய சிறுவர்களின் விஸ்தரணைகளை இலைமறை (?!!) காயாய் கையாண்ட விதமும் சிறப்பு.

ஆக்க்ஷன் 

                                       
                         வேணு (கௌரவ் ), ஹரிஷ் ( பிரவின்) மற்றும் கபில் தேவ் ( வசந்த்) இந்த மூன்று பேர் தான் படத்தின் தூண்கள். சிறுவர்கள் துப்பறியும் கதை என்றதுமே வயதுக்கு மீறிய வசனங்களும் காட்சிகளும் இருக்கும் என்று எதிர்பார்த்த எனக்கு ஏமாற்றமே. காட்சிக்கு தேவையான உடல்மொழியில் கலக்கும் சிறுவர்கள்  மூவரும் லிட்டில் சூப்பர் ஸ்டார்கள்.  அந்த "லாலிபாப்" வர்ஷினியும் கொள்ளை அழகு. வேணு தீயணைக்கும் போது வர்ஷினியின் வாயிலிருந்து விழும் அந்த லாலிபாப் ஒரு குட்டி ஹைக்கூ.

                            நட்புக்காய் தன் காதலை (?!!) தியாகம் செய்யும் இடத்தில் பிரவினும், கெமிஸ்ட்ரி வாத்தியாரிடம் உண்மையை சொல்லாமல் தடுக்க பாயும் இடத்தில் கௌரவும், தன் தந்தை குடித்துவிட்டு விழுந்து கிடக்கும் காட்சியில் வசந்தும் நடிப்பில் அசத்துகிறார்கள். வில்லர்கள் 'திருப்பாச்சி' சாய் ஹரி,  காளி, சுந்தர், கார்த்திக் நிறைவாய் செய்திருக்கிறார்கள்.

                                                                                             

இசை-இயக்கம்-ஒளிப்பதிவு-தயாரிப்பு

                                புஷ்கர் காயத்ரி, மிஷ்கின் மற்றும் சமுத்திரகனி ஆகியோரிடம் பணிபுரிந்த அனுபவங்கள் கொண்டு ஜாலியாகவும் சமூக பொறுப்புடனும் தன் முதல் படம் செய்திருக்கும் ஹலிமாவிடமிருந்து இனியும் சில நல்ல படங்களை எதிர்பார்க்கலாம். அருள் தேவ் இசை அழகு. பின்னணி மட்டுமல்லாது பாடல்களிலும் மனிதர் புகுந்து விளையாடியிருக்கிறார். தாராபுரம் பொள்ளாச்சியை அப்படியே நம் கண்களுக்கு விருந்து படைக்கும் ஒளிப்பதிவு மனோஜ் பரமஹம்சாவுடையது. ஒற்றை மரத்தில் பட்டங்கள் கோர்த்து தன் மனதிற்கு பிடித்த பெண்ணை இம்ப்ரெஸ் செய்யும் காட்சி ஒரு ஒளி ஓவியம். இவர் தான் படத்தின் தயாரிப்பும்.

                                      ஆவியை டச் செய்த காட்சி/பாடல்

                                 கார்த்திக் பாடிய "என்னுலகம்" பாடலும் "எனக்கொன்றும் வான்வெளி" பாடலும் அருமை. சில காட்சிகள் மெதுவாக சென்றாலும் சிறுவர்களின் நிறைவான நடிப்பில் நம்மை கவர்கிறது இந்த பூவரசம் பீப்பி.. அதிகம் விளம்பரம் இல்லாததாலும், திரையரங்குகளில் ஓரிரு காட்சிகளே ஓடுவதாலும் இது அதிக நாள் திரையில் காணக் கிடைப்பது சந்தேகமே.. பெரிய பட்ஜெட்டில் பொம்மையை ரசிப்பதற்கு பதில் இதை நிச்சயம் ஒருமுறை பார்த்து மகிழலாம்

                  Aavee's Comments - Chota Detectives !