ஆவி டாக்கீஸ் - மஞ்சப் பை

இன்ட்ரோ  

                          படம் பார்க்க செல்லும் முன் என் உறவினர் ஒருவர் என்னிடம் "நான் விமல் நடிச்சு ஒரு படமும் பார்த்தது இல்ல" என்றார்.. நான் பதிலுக்கு "நானும் விமல் 'நடிச்சு' ஒரு படமும் பார்த்தது இல்ல" என்றேன்.. இதிலும் ரசிகர்களின் எதிர்பார்ப்பை ஏமாற்றவில்லை.

கதை         

                             தன் பேரனைக் காண வரும் கிராமத்து மஞ்சப்பை ராஜ்கிரண்  நகரத்து பிளாஸ்டிக் பைகளுக்கு நடுவே சிக்கி 'டர்' ஆவது தான் கதை.  முதல் சந்திப்பில் ஏற்படும் வெறுப்பில் காதலியும் வெறுக்க, தான் குடியிருக்கும் அபார்ட்மென்ட்டில் எல்லோரும் வெறுக்க, தன்னை வளர்த்து ஆளாக்கிய தாத்தா செய்யும் சேட்டைகளை அமைதியாக பொறுத்துக் கொள்ளும் நாயகன் தன் கனவு துண்டாகிப் போகும்போது வெடிக்கிறான். அதை தாங்கிக் கொள்ள முடியாத தாத்தா துவண்டு போகிறார். அம்புட்டு தான் மேட்டரு.

                               எல்லாம் ஒக்கே, எதுக்காக அவர் செய்யுறத எல்லாம் சிரிச்சுகிட்டே ஏத்துக்கணும். என்ன செய்யலாம் செய்யக் கூடாதுன்னு சொல்லிக் கொடுக்கலாம் இல்லையா? ( உ.ம் அபார்ட்மென்ட் பவுன்டென்னில் தாத்தா தினமும் குளிக்கும் காட்சி)  ஏன் கிராமங்களில் பாத்ரும் வசதிகள் இன்னும் வரவில்லையா என்ன? சோகப் பாட்டெல்லாம் தமிழ் சினிமா தலைமுழுகி பல வருஷம் ஆச்சே.. டைரக்டர் எங்க சார் இருந்தீங்க இவ்வளவு நாளும்?   

                                                                                                                                            ஆக்க்ஷன் 

                              ராஜ்கிரண் வேட்டியை மீண்டும் ஒருமுறை அண்டர்வேருக்கு மேல் தூக்கிக் கட்டி (கிராமத்து மனிதராம்!!) நடித்திருக்கிறார்.. பெரும்பாலான இடங்களில் வாங்கின காசுக்கு மேல கூவியிருக்கிறார். லக்ஷ்மி மேனனின் அப்பாவை அறையும் காட்சியில் நல்ல நடிப்பு.. லக்ஷ்மி மேனன் விஷாலுக்கு மட்டுமல்ல கதைக்கு தேவைப்பட்டால் யாருக்கு வேண்டுமானாலும் லிப்லாக் செய்யத் தயார் என்ற அறிவிப்பை வைத்தாலும் வைத்தார்..செம்ம ரெஸ்பான்ஸ். அவர் அணிந்து வந்த சுடிதார் எல்லாம் நன்றாக இருந்ததாக பின் சீட்டில் ஒரு பெண் கூற இல்லல்ல நான் சிகப்பு மனிதன் ல தான் அவ சுடிதார் நல்லா இருந்தது என மற்றொரு பூங்குயில் கூறிக் கொண்டிருந்தது.

                              தமிழ் சினிமாவில் டி.ஆர், சசிக்குமாருக்கு பிறகு சிட்டி, வில்லேஜ் எந்த கேரக்டருக்கும் தாடியுடன் லோ-பட்ஜெட்டில் ஒரு ஹீரோ வேண்டுமென்றால் அது நம்ம விமலுக்கு தான் போகும் என்பதில் ஐயமில்லை. டயலாக் டெலிவரி அப்ப்பப்பா. 

                               

இசை-இயக்கம்-தயாரிப்பு

                               'என்'. லிங்குசாமி தயாரிக்க, 'என்'.ராகவன் இயக்க, 'என்'.ரகுநாதன் இசையமைக்க என்னே ஒரு படம்..!  பொதுமக்கள் யாரும் இந்தப் படம் ஓடும் தியேட்டருக்கு அருகில் கூட செல்ல வேண்டாம் என அறிவுறுத்தப் படுகிறார்கள்.. மீறி செல்பவர்களின் உடல்/ மன சேதத்திற்கு கம்பெனி பொறுப்பாகாது. 

                                      ஆவியை டச் செய்த காட்சி/பாடல்

                                 முதல் பாடலின் நடனம் மற்றும் டைட்டில் கார்டில் நாலு பேர் அசால்ட்டாக நடந்து வந்து நின்றவுடன் திருப்பதி பிரதர்ஸ் என்று வரும் காட்சி ரசிக்கும்படி இருந்தது!

         Aavee's Comments - Yellow yellow dirty fellow!