ஆவி டாக்கீஸ் - கீ & கா (Audio Review)

கீ & கா ஆடியோ விமர்சனம்.

பின்வரும் சுட்டியைக் 'கிளிக்'கவும்.

ki-ka-audio-review


உங்கள் மேலான கருத்துகளைப் பதிவிட்டால், இதில் உள்ள குறைகளைத் திருத்திக் கொள்ள உதவும்.

-புன்னகைகளுடன்,
ஆவி.

இறுதிச்சுற்று Vs தாரை தப்பட்டை.

SPOILER ALERT:

                இரண்டு  படங்களும்  வெவ்வேறு கதைக் களங்கள், வெவ்வேறு இயக்குனர்கள், முற்றிலும் வேறுபட்ட படங்களைப் போல தோன்றினாலும் அவற்றுள் இழையோடிய ஒரு மெல்லிய ஒற்றுமையைக் காண முடிந்தது. இரண்டிற்குமான சூழல் ஆங்காங்கே ஒத்திருப்பதாய் தோன்றியது. 'கதை சொல்லும் பாணியிலா' இல்லை 'கதை சொல்லி' யின் எழுத்திலா அந்த சூழலை மக்களுக்கு பிடிக்கும் விதத்தில் சொன்னதில் அறிமுக இயக்குனர் என்ற போதும் ஒருவர் வெற்றி பெறுகிறார், மற்றவர் தேர்ந்த இயக்குனர் என்ற போதும் தோல்வியடைகிறார்.

தைரியமான கதாநாயகி:  இரண்டு படங்களிலுமே நாயகியின் கதாப்பாத்திரங்கள் வலுவானதாகவும், மிகுந்த தைரியசாலியாகவும் படைக்கப் பட்டிருந்தது. தனது தனித்திறமையை வெளிக்கொணர்ந்த குருவின் மேல் காதல் கொள்கிறாள். குருவுக்கு ஒரு அவமானம் எனும் போது அதைத் துடைக்க தன் திறமையை வெளிப்படுத்தி உலகிற்கு தான் யார் என்பதை நிரூபிக்கிறாள். இவள் திறமையின் மீது ஆர்வம் கொண்டு அழைப்பது போல் அழைத்து அடைய நினைக்கும் எதிராளி. இப்படி பலப்பல ஒற்றுமைகள்


திறமையே உருவான நாயகன்: தான் கற்றுக் கொண்ட வித்தைகள் அனைத்தையும் கதாநாயகிக்கு கற்றுக் கொடுத்து அவளை ஊரிலேயே சிறந்த வித்தகியாய் மாற்றுகிறான். நாயகியின் மேல் தனக்கு காதல் இருந்த போதும், தன் மீது காதல் கொண்டு தன் பின்னால் வரும் அவளின் காதலை சூழ்நிலையால் ஏற்க மறுக்கிறான். அவள் மேல் பிரியங்கள் நிறைந்திருந்த போதும்  அதை வெளிக்காட்டாமல் அவள் மீது கடிந்து கொள்கிறான்.

மாறுபட்ட இரண்டாம் பகுதி: நாயகனின் பிரிவின் போது வேறொருவன் ஆசை வார்த்தைகள் கூறி நாயகியின் கற்பை சூறையாடப் பார்க்கிறான். இதுவரை இரண்டு படங்களுமே கிட்டத்தட்ட ஒரே பாதையில் பயணிப்பதாய் தோன்றுகிறது. இதன் பின் முதல் பகுதியில் தைரியமான பெண்ணாக உருவகப்படுத்தப்பட்ட அந்த நாயகியின் கதாப்பாத்திரம் ஒரு சிறு எதிர்ப்பையும் காட்டாமல் பணிந்து போவது போல் தாரை தப்பட்டையில் காட்சியமைப்பு இருக்கும். இறுதிச் சுற்றில் தன்னை அடைய நினைக்கும் கயவனுக்கு தக்க பதிலடி கொடுத்து திரும்புகிறாள்.

சோகமான முடிவுக்காக வைக்கப்பட்ட காட்சியமைப்புகள் என்ற போதும் நாயகியின் பாத்திரப் படைப்பு திசைமாறிப் போன காரணம் கூட படத்தின் தோல்விக்கு காரணமாக இருக்கக் கூடும். அந்தக் கதாப்பாத்திரம் தனக்கு முன் வைக்கப்பட்ட சவாலை எங்ஙனம் எதிர்கொண்டு வாழ்வில் வெல்கிறாள் என்று ஒரு ரசிகன் எதிர்பார்க்கும் முடிவைக் கூறியதாலேயே புதிய இயக்குனர் என்ற போதும் இறுதிச் சுற்று இறுதிச் சுற்றில் வெற்றி வாகை சூடுகிறது.

நகைச்சுவைக் காட்சிகள்: மேலும் திணிக்கப்பட்டதாய் இருக்கக் கூடாது என்பதற்காக தவிர்க்கப்பட்டிருக்கும் நகைச்சுவை காட்சிகள். காட்சிகளோடு ஒன்றி வரும் மெல்லிய நகைச்சுவை ரசிகர்களை சிரிக்க வைக்க வேண்டும். வழக்கமாக அதில் வெற்றி பெறும் இயக்குனர் பாலா இதில் கோட்டை விட்டிருக்கிறார். அதே சமயம் காளி வெங்கட்டின் கதாப்பாத்திரம் மற்றும் லிவர் ஃபிரை பற்றி நாசர் பேசும்போதும்  ஒரு சாமான்ய ரசிகன் தன்னையும் மறந்து சிரித்து விடுகிறான்.


இசை : இசையைப் பொறுத்தவரை இசை ஆளுமையின் இத்தனை வருட அனுபவம் நிச்சயம் படத்திற்கு பக்கபலமாய் இருக்கிறது. ஆயினும் சந்தோஷ் நாராயணனின் இளமை துள்ளும் இசை, படத்தை அடுத்த கட்டத்திற்கு உயர்த்தும்படி இருந்தது.


                 மாதவனின் யதார்த்த நடிப்பு, ரித்திகாவின் குறும்பு ப்ளஸ் இளமை ததும்பும் நடிப்பு, தமிழ்நாடு திரையில் வெல்லும் போது ஒவ்வொரு ரசிகனும் தானே வெல்வது போல் உணர்கிறான். வரலட்சுமி மற்றும் சசிகுமார் சிறப்பாக முயன்ற போதும் சரியாக வடிவமைக்கப்படாத திரைக்கதையால் அது விழலுக்கிறைத்த நீராகிறது. தாரை தப்பட்டை சப்தமில்லாமலும், இறுதிச்சுற்றில் வெற்றி மணி ஓங்கியும் ஒலிக்கிறது.




                  

பிரேமம்

பிரேமம்- மலையாளத் திரையுலகம் எப்போதும் கதை நிறைந்த திரைப்படங்களுக்காகவே பேசப்படும். இந்த பிரேமம் திரைப்படத்தில் திரைக்கதையே அதிகம் பேசப்பட்டது. பிரேமம் என்றால் காதல். காதல் கதையில் இனி புதிதாய் சொல்ல என்ன இருக்கிறது. கதையின் நாயகன் தன் பள்ளி நாட்களில் ஆரம்பித்து, பின் கல்லூரி, வேலை பார்க்குமிடம் என மூன்று கதாநாயகிகளை காதலிக்கிறார். அதை சுவாரஸ்யமாய் சொன்ன விதத்தில் தான் இந்த படம் வெற்றி பெற்றிருக்கிறது. இன்றைய நாட்களில் திரைப்படங்கள் இரண்டு வாரங்கள் ஓடுவதே அபூர்வமாகிவிட்டது. இந்தப்படம் நூறு நாட்களை கடந்து ஓடி நல்ல படங்களை நேசிக்கும் ரசிகர்கள் இன்னும் திரையரங்கிற்கு வரத்தான் செய்கிறார்கள் என்பதை உறுதி செய்திருக்கிறது. இந்தப் படத்தின் விமர்சனம் இங்கே - பிரேமம்(விமர்சனம்) .

ஆவி டாக்கீஸ் - இன்டெர்ஸ்டெல்லர் (Interstellar)

இன்ட்ரோ  

                              சயின்ஸ் பிக்க்ஷன்களின் வரிசையில் வந்திருக்கும் மற்றொரு படம் என்று ஒற்றை வரியில் சொல்லிவிட்டு போகக்கூடிய படமாய் நிச்சயம் இது இல்லை. தவிர கிறிஸ்டோபர் நோலன் எனும் மந்திரச் சொல் நிச்சயம் மாயம் செய்திருக்கிறது. விண்வெளிப் பயணம் என்ற அகன்ற வெளிக்குள் அப்பா-மகள் சென்டிமென்ட், விவசாயத்தின் வேதனைகள், சுய எள்ளல்கள் போன்றவற்றையும் கலந்து காக்டெயிலாக தந்த நோலனுக்கு ஒரு சல்யுட்..!

                          

கதை

                         
                           71 சதவிகிதம் நீராலும் 29 சதவிதிகம் நிலத்தாலும் சூழப்பட்ட இந்த பூமிதான் மனிதன் வாழ்வதற்காக படைக்கப்பட்டதா? இல்லை வேறேதும் நிலம் நீர் மற்றும் உயிர் வாழதகுந்த ஒரு  கிரகத்தில் வாழ்ந்திருக்க வேண்டியவர்களா இந்த மனிதர்கள் என்று தீர்க்கமாக யோசிக்க வேண்டிய உட்கருத்தை பிஸிக்ஸும் பீலிங்ஸும் ஒரு சேர கற்பனை கலந்து சொல்வதுதான் கதை. சில நாட்கள் முன் வந்த கிராவிட்டி, எலிசியம் போன்ற படங்களை தொடர்ந்து வந்திருக்கும் இந்தப்படம் ஹாலிவுட் அடுத்த கட்டத்திற்கு நகர்ந்து செல்வதையே காட்டுகிறது. ( இன்னமும் பேஸ் வாய்ஸில் 'நான்தாண்டா கொமாரு' என்று படமெடுக்கும் கோலிவுட் இயக்குனர்கள் இதை கவனிப்பார்களா?)
                             

        

                                                                                                                                            ஆக்க்ஷன் 

                           நாயகன் மேத்யு பல பரிமாணங்களில் ஜொலிக்கிறார், நோலன் தன் ஆஸ்தான நாயகன் கிறிஸ்டியன் பேல்லை விடுத்து இவரை தேர்வு செய்ததை இவர் சிறப்பான நடிப்பின் மூலம் நியாயப்படுத்தியிருக்கிறார். மெக்கன்ஸி பாய் (மர்ப்ப்) குழந்தை நட்சத்திரம் என்பதையும் தாண்டி மனதை வருடுகிறார். அன் ஹேத்வே தனக்கு கிடைத்த வாய்ப்பை சரிவர பயன்படுத்தியிருக்கிறார்.  சிறிது நேரமே வந்தாலும் மேட் டேமன் கலக்கல் நடிப்பு. தான் ஒரு பெரிய ஹீரோ என்கிற பந்தா இல்லாமல் ஒரு நெகடிவ் கேரக்டரில் நடிக்க சம்மதித்தற்காகவே இவரை பாராட்ட வேண்டும்.

                          கேஸ் மற்றும் டார்ஸ்  ரோபோட்டுக்கு குரல் கொடுத்தவர்கள் சிறப்பான முறையில் செய்திருக்கிறார்கள்.
                               

இசை-இயக்கம்

                           நோலனின் படங்களுக்கு பக்க பலமாக இருக்கும் ஹன்ஸ் ஜிம்மரின் இசை இதில் அதகளம் செய்திருக்கிறது. விண்வெளிக்கு சென்றவர்களுடன் நாமும் பயணித்தது போன்ற உணர்வை கொடுத்தது ஹன்சின் இசை. நல்ல இசைக்கட்டமைப்பு உள்ள திரையரங்கில் பார்க்க ஆவி டாக்கீஸ் பரிந்துரைக்கிறது. (பெங்களூர் மற்றும் வெளியூர் வாசிகள் முடிந்தால் ஐ-மேக்ஸில் பாருங்கள்)
  
                           நோலனின் படங்கள் முதல் காணலில் புரியாது என்ற வாதங்கள் ஒவ்வொரு முறையும் வைக்கப்படும். ஆனால் சிக்கலான இந்த கதையையும் எளியவர்களுக்கும் புரியும் வண்ணம் திரைக்கதை அமைத்து வெற்றி காண்கிறார் நோலன். கிளைமாக்ஸ் புரிதலுக்காக வைக்கப்பட்ட Ghost காட்சிகள் சிறு குழந்தைகளும் புரிந்து கொள்ளும் வண்ணம் உள்ளது.

                                      ஆவிக்கு பிடித்த பாடல்/ காட்சி 

                                'ப்ளாக் ஹோல்' வழியாக விண்வெளி ஓடம் பயணிக்கும் காட்சி மயிர்கூச்செறிய வைக்கும் அருமையான காட்சி. குடும்பத்துடன் சேர்ந்து பார்க்க அருமையான படம்.

                

Aavee's Comments -  A Journey to Space!

ஆவி டாக்கீஸ் - ஒரு ஊர்ல ரெண்டு ராஜா

இன்ட்ரோ  

                              கொஞ்சம் மொக்கை காமெடிகளை குறைத்துக் கொண்டு கதையின் வீரியத்தை ஆழமாக சொல்லியிருந்தால் படத்தின் வீச்சு நிச்சயம் வேறாக இருந்திருக்கும். சமூக கருத்துகளை மேலோட்டமாக சொல்லிவிடுவதாலேயே சிறந்த படமென சொல்லிவிட முடியாது. கண்ணன் இன்னும் கொஞ்சம் கைவரிசை காட்டியிருக்கலாம்..!

                          

கதை

                            ஸ்டீல் கம்பெனி ஒன்றில் பணிபுரியும் தொழிலாளர்களுக்கு அங்கிருக்கும் பழுதடைந்த முதலாளிகள் மற்றும் இயந்திரங்களால் ஏற்படும் உடல் பாதிப்பையும், ஆதிக்க சமூகத்தின் அலட்சிய போக்கையும் சுட்டிக் காட்ட முயலும் ஒரு பெண்ணுக்கு உதவ வரும் இரண்டு வருத்தப்படாத வாலிபர் சங்க உறுப்பினர்கள். அவர்கள் மூவரும் சேர்ந்து கார்பொரேட் முதலைக்கு எதிராக போராடி அவர் மனதை மாற்றுவது தான் கதை.
                             

        

                                                                                                                                            ஆக்க்ஷன் 

                           விமல், நோ கமெண்ட்ஸ். சூரிக்கு இதுபோன்ற ஹீரோக்களுடன் நடிப்பதால் நிச்சயம் தன் காமெடியன் அந்தஸ்திலிருந்து காமெடி ஹீரோ அந்தஸ்திற்கு உயர்த்திக்கொள்ள முடியும். ஆரம்பம் முதல் கிளைமாக்ஸ் வரை சரி பகுதி ஆக்க்ஷன் இவருக்கும். நாசர் பலமுறை இவரை இதுபோன்ற பாத்திரங்களில் பார்த்து சலித்து விட்டதால் படத்தின் இறுக்கத்திற்கு பயன்படாமலே போகிறார்.

                              ப்ரியா ஆனந்த்- ஹீரோயினுக்கு முக்கியத்துவம் அளிக்கும் கதைகளை தேர்வு செய்து நடிக்கிறார். படத்தின் முக்கிய காட்சிகளில் பாஸ் மார்க்கும் வாங்கி விடுகிறார். ஆனாலும் இதுபோன்ற படங்களில் கிளிவேஜ் தெரிய காஸ்டியும்ஸ், இனியாவின் ஐட்டம் டான்ஸ், படம் எங்கும் தெளிக்கப்பட்டிருக்கும் மொக்கை காமெடிகள் போன்றவை படத்தை ஆவரேஜ்ஜுக்கும் கீழ் கொண்டு செல்கிறது.

                             விசாகா சிங் அழகான கதாப்பாத்திரத்தில் வந்து போகிறார்.  ஒரு தொழிலாளி உயிர் விட்டதை விட தொழிலாளிகளுக்கு காது கேளாமல் போவது முக்கியமாக போய்விட்டதா, கோர்ட் காட்சிகளில் வசனங்கள் ஷார்ப்பாக இருந்திருக்கலாம்.
                               

இசை-இயக்கம்

                               இமான் சுமாருக்கு சற்று மேல். பாடல்கள் ஒக்கே. ரீரெக்கார்டிங் இன்னும் பெட்டராக இருந்திருக்கலாம். 'ஜெயம்கொண்டான்' கண்ணனை எதிர்பார்த்து போனால் அங்கே 'சேட்டை' கண்ணன் தெரிவது ஏமாற்றம்.

                                      ஆவிக்கு பிடித்த பாடல்/ காட்சி 

                                'மழைக்காத்தா' மற்றும் 'சுந்தரிப் பெண்ணே' பாடல்கள் இனிமை. லக்ஷ்மி மேனனின் குரல் ஆளுமையில் 'குக்குறு' பாடல் கேட்பதற்கு அருமை.

                  

Aavee's Comments -  Powerless kings !

ஆவி டாக்கீஸ் - ஜிகர்தண்டா

இன்ட்ரோ  

                           கார்த்திக் சுப்பாராஜ் ஒரு மேடையில் இந்தக் கதையை சொதப்பலாக சொன்னார், ஸ்க்ரிப்ட் படித்து தான் புரிந்து கொண்டேன் என்று சித்தார்த் கூறினார்.. அது கார்த்திக்கின் குற்றமல்ல, இது போன்ற கதையை சொல்வதற்கு கொஞ்சம் தலைகீழாய் நின்று தண்ணி குடித்து தான் ஆக வேண்டும்.. முடிந்தவரை நடிகர்களுக்கு அந்தந்த காட்சிகளில் என்ன செய்ய வேண்டும் என்பதை மட்டும் சொல்லிக் கொடுத்து வேலை வாங்கியிருக்கக் கூடும். வேலையில்லா பட்டதாரிக்கு பயந்து ஒரு வாரம் தயாரிப்பாளர் பின் வாங்கியதிலும் ஒரு நியாயம் இருக்கத்தான் செய்கிறது.

                          

கதை

                           படத்தின் விளம்பரத்தை பார்த்துவிட்டு ஒரு காட்பாதரையோ, பாட்ஷா வையோ எதிர்பார்த்து சென்றால் ஏமாற்றமே மிஞ்சும். மேலும் இந்தப் படத்திற்கு நியாயப்படி U கொடுத்திருக்க வேண்டியது.. U/A சர்டிபிக்கேட் நிச்சயம் ஒரு மாஸ் எபெக்டிட்காக டைரக்டர் போராடி வாங்கியிருக்க வேண்டும். சரி கதைக்கு வருவோம்..

                            ஒரு தாதாவின் கதையை படமாய்  எடுக்க வேண்டி தாதாவின் நடவடிக்கைகள், அவன் வாழ்க்கை முறை, அவன் தாதாவான கதை ஆகியவற்றை தெரிந்து கொள்ள வருகிறான் ஒரு அறிமுக இயக்குனர். தன் தலைக்கு தொழில் முறையிலும், போலிஸ் வகையிலும் ஆபத்து இருப்பதாலும் தன்னை கொலை செய்ய ஒரு உளவாளி வந்திருப்பதை  தெரிந்து கொண்டும்  எல்லோரையும் ஒரு சந்தேகக் கண்கொண்டு பார்க்கிறான் அந்த தாதா. ஒரு கட்டத்தில் அந்த உளவாளி யார் என்று கண்டுபிடிக்கும் முயற்சியில் தாதாவிடம் சிக்கிக் கொள்கிறான் அந்த இயக்குனர்(ன்). தாதாவிடமிருந்து  அவன் தப்பித்தானா? இல்லையா என்பதுதான் கதை. இது முதல் பாதி மட்டுமே, இரண்டாம் பாதியில் எப்படி தப்பித்தான் என்பதை நகைச்சுவையோடு (?!!) சொல்லியிருப்பதுதான் படத்தின் ஆகச்சிறந்த ட்விஸ்ட்டாம் (அப்படித்தாம்பா டைரக்டர் சொன்னாரு)

        

                                                                                                                                            ஆக்க்ஷன் 

                           சிம்ஹா (சூது கவ்வும் படத்தில் பகலவனாய், நேரத்தில் வட்டி ராஜாவாய் வந்து கலக்கியிருப்பாரே, அவரேதான்) படத்தின் முதுகெலும்பு. அசத்தல் நடிப்பு. குறிப்பாக டாய்லெட்டில் தன்னை கொல்ல வருபனை முறைத்துவிட்டு உள்ளே செல்லும் காட்சி ஒன்றே இவர் நடிப்புக்கு சாட்சி.. தமிழ் சினிமாவில் ஒரு தனியிடத்தை பிடிக்க நிச்சயம் வாய்ப்புண்டு.. ஆனால் அதற்கு அவர் இனிமேல் ஜிகர்தண்டா போன்ற படங்களை தவிர்த்தால் நிச்சயம் சாத்தியம். சித்தார்த் அண்டர்ப்ளே பண்ணுகிறேன் பேர்வழி என கிட்டத்தட்ட பாரின் மாப்பிள்ளை கேரக்டர் தான். லக்ஷ்மி மேனனின் கதாப்பாத்திரம் கேக்கின் மேல் வைக்கப்பட்ட செர்ரி போன்றது.. (அது இல்லாவிட்டாலும் கேக்கை நம்மால் ருசித்திருக்க முடியும்)

                             படத்தில் தொய்வு ஏற்படும் போதெல்லாம் நம்மை உற்சாகப் படுத்துவது கருணாகரனின் உடல் மொழியும் டயலாக் டெலிவரியும் தான்.. செம்ம டைமிங் பாஸ். ஆனா நீங்களும் இந்த ஷார்ட்பிலிம் டைரக்டர்கள் கண்ணில் படாமல் ஒரு கேரக்டர் செய்தால் பிழைச்சுக்கலாம். இது ஒரு கேங்ஸ்டர் மூவி என்ற நினைப்பில் அதிரடி ஆக்க்ஷன் காட்சிகள் எதிர்பார்த்து செல்வதை தவிர்ப்பது நல்லது..

இசை- இயக்கம்-தயாரிப்பு

                             இசை- ஒரு சில இடங்களில் நடிகர்களின் நடிப்பை மிஞ்சும் அளவிற்கு சிறப்பான இசையும் இருக்கிறது. சில இடங்களில் ஒரு கத்துக்குட்டியின் இசைக்கு மிக அருகாமையில் இருக்கிறது. மொத்தத்தில் சுமார் தான்..  இன்னும் நிறைய எதிர்பார்க்கிறோம் சந்தோஷ். உங்களை இளையராஜா, ரகுமான் வரிசையில் ஒப்பிடும் ரசிகர்களுக்கு இந்தப் படத்தில் பிரமாதமாக ஒன்றும் தரவில்லை.

                              கார்த்திக் - ஒரு வித்தியாசமான கதையை கையாண்டது தவறில்லை.. ஆனால் பீட்சா எனும் படத்திற்கு அடுத்து பண்ணும் படம் இன்னும் கொஞ்சம் ஸ்க்ரிப்டில் கவனம் செலுத்தியிருக்கலாம். நாட் பேட்- நாட் சோ குட். பணம் போட்ட தயாரிப்பாளரையே கிண்டலடித்து எடுத்தால் அவரோடு பிரச்சனை வராமல் என்ன செய்யும் பாஸு?

                                      ஆவியை டச் செய்த காட்சி/பாடல்

                                டிங்-டாங், கண்ணம்மா, பாண்டி நாட்டு பாடல்கள் படத்துடன் பார்க்க இனிமையாக இருக்கிறது. கிளைமாக்ஸ் காட்சியில் இவ்வளவு டீடைலிங் அவசியம் இல்லை.. சுருக்கமாக சொன்னால் ஆடியன்ஸ் புரிந்து கொள்ள மாட்டார்களோ என்பதால் ஒரு பத்து நிமிடம் நம்மை இழுத்துக் கொண்டு போயிருக்க வேண்டாம்.

                             

Aavee's Comments -  Something missing in the Recipe!